Benvidos ao Museo do Pobo Galego

EXPOSICIÓN PERMANENTE: Hábitat e arquitectura

Nun sentido amplo, considérase arquitectura toda intervención sobre o territorio para adaptalo ás condicións da vida humana, desde o trazado de camiños e a decrúa de terras de cultivo ata as edificacións propiamente ditas.

A pedra local é o material básico, e as diversas solucións construtivas obedecen ás características cambiantes do medio. A casa do litoral comprende desde as vivendas máis humildes das aldeas de pescadores ata as sólidas edificacións dos portos, en boa cantería, e moitas veces con soportais; a do interior presenta desde o tipo propio das serras, adaptado a condicións meteorolóxicas extremas, ata a casa das comarcas agrícolas, máis ampla e confortable.

A carón da vivenda encóntranse outras construcións auxiliares, cunhas características determinadas pola súa función: hórreos e alpendres para o almacenamento de produtos e apeiros agrícolas; cortes, pombais, alvarizas para os animais; eiras, muíños, fornos, adegas, obradoiros de oficios, destinados á elaboración e transformación dos produtos; feiras temporais ou permanentes onde se practica o intercambio; fontes, pozos, lavadoiros e outros sistemas de aproveitamento dos recursos naturais.