Benvidos ao Museo do Pobo Galego
A Biblioteca do Museo do Pobo Galego inicia a súa andaina coa creación do centro no ano 1977. A maior parte dos ingresos proceden de doazóns individuais ou institucionais, seguidos polos intercambios con museos, fundacións e outras institucións de carácter cultural e por último, e xa en menor medida, as adquisicións.
Dentro dos ingresos por doazón cabe subliñar os legados, depósitos ou doazóns de bibliotecas privadas completas tales como as de Xoaquín Lorenzo Fernández, Antonio Rodríguez Fraíz, Xesús Taboada Chivite, Antonio Fraguas Fraguas, Manuel Beiras García, Fermín Bouza Brey e Familia Baltar, xunto a aportacións de menor cuantía pero tamén salientables, procedentes das bibliotecas de Vicente Risco, Blanco-Cicerón, Díaz Romaguera, etc.
Todo isto nos aproxima aos 60.000 rexistros bibliográficos no tocante a monografías, que xunto aos 1200 títulos de revistas conforman un fondo superior aos 120.000 volumes.
A Biblioteca conta cun fondo antigo de preto de 1. 800 volumes, sendo case a metade, referentes ou relacionados con Galicia.
A temática se ben e moi diversa pola diferente procedencia dos fondos, ten sempre como referente Galicia en todas as súas manifestacións culturais (literatura, historia, arte, antropoloxía, museoloxía, cine, música, etc..) sen esquecer os coñecementos científicos, económicos, medioambientais ou políticos que están plasmados en papel. A Biblioteca pretende ser un referente en antropoloxía, museoloxía e cultura galega.
